Raja Mandidang Sitorus
Pinomparna: 1. O.Sohuturon helani Butarbutar Lumban Robean, 2. R.Rumagaja helani Butarbutar Sihiong, 3. Pangalahat helani Manik Lumban Manik Narumontak, 4. Sortaniaji helani Butarbutar Pulopulo.
Panghataion di Ulaon Pasahat Sulangsulang Pahompu.
Tulisan ini saya dedikasikan untuk putraku Hitado Managam Sitorus(saat ku tulis dia berusia 7 tahun 11 bulan) yang sangat tertarik dengan budaya Batak bahkan berkeinginan kelak menjadi Raja Parhata. Kiranya kelak tulisan ini menjadi salah satu warisan yang sangat berharga bagi dia.
Berhubung proses penulisan membutuhkan waktu, tenaga dan pikiran, maka dengan hormat kepada para pembaca yang budiman yang ingin me repost di blog maupun media lain agar mencantumkan sumbernya dan jika tidak keberatan silahkan copy paste apa adanya.
Saya sangat kecewa karena beberapa tulisan saya sebelunya di re post di blog maupun media lain namun tidak mencantumkan sumber.
Saya pribadi setiap membuat tulisan berupaya semaksimal mungkin untuk menuliskan sumber dan referensi selama masih saya dapatkan sumbernya. STOP hentikan plagiat.
Demikian harap maklum.
Horas.
Contoh panghation ulaon Pasahat Sulangsulang pahompu di ari Sabtu 19 Maret 2011 kel. Jeffer Hawer Sitorus,SE,MM dohot parumaennami Mira Koesoema Rany br Tampubolon, SH (A.Imanuel Yosua Magistero Sitorus).
Dung sidung marbagi jambar dohot manjalo pangurupion (tumpak) sian boru, ale-ale dohot dongan tubu, diudut ma tu namarhata. Tarsongon on ma partordingna:
Protokol Sitorus ->Raja Boltok).
Ima tutu ala naeng mulaanta ma manghatai dohot hulahulanta Raja i Raja Tampubolon, onpe di hamu haha doli Raja Dori dohot haha doli Raja Pane, di dok natua tua molo tinallik huling huling tarida ma holi holi, molo anggina bona ni hasuhuton hahadoli Raja Dori dohot hahadoli Raja Pane ma antong na gabe Parsinabung dohot Panamboli. Dihamu hahadolinami, ala di hami raja Boltok ma hasuhuton hupasahat hami ma tu hamu asa hamu ma na gabe Raja Parsinabung dohot Panamboli di ulaonta sadarion, partingkian on hupasahat hami ma tu hamu hahadoli nami.
Hahadoli Raja Pane (St. Rindu Sitorus).
Mauliate ma di hamu anggidoli nami tutu ma na nidok mu i molo tinallik huling huling tarida ma antong holi holi, ala hamu anggidoli nami ma bona ni hasuhuton, hami hahadoli mu ma antong na gabe Parsinabung dohot Panamboli. Sian dos ni rohanta jala nunga tahasomalhon anggidoli Raja Dori ma antong na gabe Raja Parsinabung. Antong pinasahat ma tu anggidoli Raja Dori na gabe Raja Pangalusi di sungkunsungkun ni hulahuanta Raja i Raja Tampubolon. Partingkian on hu pasahat hami ma tu hamu anggidoli nami Raja Dori, botima.
Raja Dori (anak niba Pahotan Sitorus)
Mauliate ma di hamu hahadoli nami Raja Pane, songoni ma di hita pomparan ni ompunta Raja Dori, nunga di pasahat hahadolinta Raja Pane tu hita asa mardos ni roha mahita ise ma hita na laho mangalusi sungkunsungkun ni hulahulanta Raja i Raja Tampubolon ? Boa dos ma rohanta ni pasahatma tu natua tua i Ama Managam asa ibana ma Raja na tapajolo ? (diolophon natorop nauli). Jadi songon i ma hupasahat hami ma tu natua tu i.
Sampe Sitorus (Ama Hitado Managam Sitorus) selanjutnya menjadi Raja Parhata ni Sitorus.
Gabe ma tutu jala horas, mauliate ma di hita na marhaha marranggi ala nunga dos rohanta jala di pajolo hamu ahu na gabe Raja Pangalusi di sungkunsungkin ni Raja i Raja Tampubolon, antong hu jalo hami dibagasan unduk dohot serep ni roha.
Jadi songoni ma nang di hamu nahuparsangapi hami Hula-Hulanami dohot saluhut horong ni Tulang nami Rajai Raja (bacakan daftar horong ni Hula-hula dohot Tulang) ala naeng mangarade ma hami laho mangalusi sungkun sungkun ni Hulahulanami Raja i Raja Tampubolon, jumolo ma tangkasan nami hamu hulahula nami.
Raja nami di dok natua tua Dijolo hamu siaduon, dipudi hamu sipaimaon, sihorus nasuksuk do hamu Rajanami sigohi nalonga, songon nidok ni umpama Rajanami: Ranting ni Bulu Duri, sanjongkal dua jari, Hula-Hula naburju do hamu na olo manuturi mangajar ajari hami Raja parhata ni Pamoruonmuna, antong raja nami annon adong do tingkina dohot ombasna di hami Raja parhata ni Pamoruonmuna mangido panuturion sian hamu di panghataionnami dohot Hulahula nami asa sude mardalan tu na denggan, dohot las ni roha, nueang na manangkasi ma hami boha Rajanami nunga tipak be parhundul ni Raja i?. Mauliate ma Rajanami.
Ala naeng mulaan ma manghatai dohot Raja i asa tangkas ma tapaihut –ihut, songon i ma nang di inanta soripada asa marnapuran ma hamu.
Suang songoni ma di hamu Raja ni Parhobas nami ala naeng manghatai ma angka Raja marhite on pinangidohon tu hamu molo tung adong na naeng sihobasan jala siparadeon tu angka Raja dohot na niontang annon ma dung sidung marhata angka Raja, jala pinangido asa unang adong na marlaosi sian joloni Raja (jangan ada yang jalan di depan /diantara Raja Parhata ni Sitorus dan Raja Parhata ni Tampubolon).
Songoni ma di hamu Hulahulanami Raja i Raja Tampubolon, nunga mangarade hami Rajanami, partingkian on hupasahat hami ma tu hamu, Botima.
Protokol ni Raja Tampubolon
Jadi ima amangboru. Andorang so ta mulai panghataion asa lehon hamu ma jolo partingkian di hami namarhaha maranggi asa marsiaturan hami laho manungkun haroro ni amang boru.
(Selanjutnya marsiaturan ma Raja Tampubolon – persis songon na niulahon ni Raja Sitorus di nalaho mangarade nasida). Dung simpul di uduti ma
Raja parhata ni Tampubolon
Jadi ima amangboru .
Asa tek tek mula ni gondang, ser ser mula ni tortor, sise inna mula ni hata.
Artia mula ni ari, sipaha sada mula ni bulan, Binsar ma mata ni ari poltak mata ni bulan.
Ala naeng mulaanta ma manghatai denggan ma dipasahat Raja ni Boru pinggan panungkunan.
Raja parhata ni Sitorus (Sampe Sitorus)
Ima tutu di hamu hula hula nami Raja Tampubolon. Barisbaris ni gaja di rura pangaloan, nunga marsuru raja denggan ma antong oloan, ai molo ni oloan dapot ma antong angka parsaulian.
Asa Artia ma antong mula ni ari. Sipaha sada mula ni bulan.
Binsar ma antong mata ni ari poltak mata ni bulan.
Naeng mulaan ma antong manghatai dohot Raja i denggan ma antong pasahathon pinggan panungkunan .
On pe di hamu boru nami pasahat hamu ma tu Raja i pinggan panungkunan on.
RAJA PARHATA NI TAMPUBOLON:
Mauliate ma Raja ni Boru (Amangboru), dison nunga dipasahat hamu Pinggan Panungkunan,
Di son adong napuran sirara uruk, napuran rata. Sai rata ma tutu di hita panggabean parhorasan.
Di son muse adong boras si pir ni tondi, boras si ribur-ribur, asa torop maribur ma pinomparta.
Asa pirma pokki, bahul-bahul pansaloman, pirma tondita ditambai Tuhan di hita angka pansamotan.
Dison muse ringgit/Rupia namararga, homitan ni boru ni Raja, sipatamba las ni rohanta diloloan bolon on, tarida ma antong dison na Anak ni Raja do hamu, Pahompu ni namora, asa dohononnami ma Binanga ni Sihombing binongkak ni tarabunga, tu sanggar ma amporik, tu lubang ma satua, sai sinur ma napinahan gabe naniula, hujalo hami ma on: (catatan: dibuat ma hepeng i, 3 lembar: salembar dilehon tu hambirangna, salembar dilehon tu siamunna, jala salembar ma hasurungan ni ibana Raja Parsinabung ni Tampubplon) huhut ma dijou Boru: Hamu Borunami pasahat hamu ma jolo Pinggan Panungkunan on tu Paribanmu Parhata ni Borunami, jala dung sahat diuduti ma hatana mandok: di hamu Borunami, sahat ma Pinggan Panungkunan on tu hamu asa gabe Pinggan Pangalusi, mauliate ma.
Diuduti ma hatana mandok: Amangboru, molo tung hundul dikarosi pe hita, tarajumi ma naung hundul diamak tiar ma ate amangboru ? (Alusni Raja Parhata Sitorus: Nauli Tulang)
Ba ia hundul hita nuaeng di amak tiar di inganan namarampang namarjual sigonggom pangisina, sai tiar ma antong parhorasan panggabeani di hita tu angka ari nanaeng ro.
Nuaeng pe Raja ni Boru, sai jolo ninang-nang do inna asa ninung-nung, sai jolo pinangan do asa sinungkun. Asa nunga huhabosurhon hami sipanganon naung pinatupamu, sagat hami marlompan juhut dohot minum aek sitio-tio, asa dohonon ma:
Bagot namarhalto niagatan ndung marmeang.
Horas ma hami namanghasagathon martamba tamba ma pansamotan dihamu namangalean.
Amangboru, dia ma laklakna, dia ma unokna. Dia ma hatana jala dia ma nanidokna, tangkas ma dipaboa amangboru sintuhu ni indahan masak, lompan na tabo dohot aek sitiotio naung huparsaulihon hami boti ma.
RAJA PARHATA NI SITORUS (SAMPE SITORUS)(mangalusi dung dijalo Pinggan Pangalusi)
Mauliate ma Tulang las ma rohanami, dison nunga hujalo hami pinggan pangalusi. Didok natu-tua Ni durung situma laos dapot porapora, molo pinajolo sada Raja sai adong do antong upa ni naloja, dihita namarhaha maranggi… dos ma rohanta upa loja ni raja napinatujolo ma on ate, jadi pinamasuk majo on tu hajut niba, mauliate ma.
On pe antong Rajanami, songon nanidokmunai ma tutu, sai tu tiarna ma parhorasan panggabeani sai lam tu tiona angka pansamotani dihita tu angka ari namangihut.
Manungkun ma hamu tutu di sintuhu ni sipanganon na so sadia i, jala dohononnami ma:
Asa sitiktik mar sigompa, golang-golang pangarahutna.
Otik so sadia pe na tupa, sai godang ma pinasuna.
Hinarat pangkal ni tobu lam tu tonggina, ndada namangholit hami Rajanami tung sibahenon do so sadia, molo tung namangholit pe Rajanami, siala ni tangiangmu tu Amanta Debata sai tu tambana ma naniholit asa boi tarpatupa hami nadumenggen tu joloan on laho pasangaphon hamu Hulahulanami.
Asa bagot na marhalto ma naniagatan di robean,
Horas ma di hamu na manghasagathon,mandok mauliate ma hami na patupahon.
Taringot tu sungkun-sungkun ni Rajai, alusannami ma tutu: Panggabean Parhorasan do nidokna, boti ma Rajanami
RAJA PARHATA NI TAMPUBOLON :
Horas ma jala gabe Amangboru dialusmunai, ia didok hamu panggabean parhorasan do hape nanidokna, ba mauliate ma tadok tu Amanta Pardenggan Basa i, tutuma songon nanidokmuna i:
Timbo dolok martimbang panatapan tu pangaloan, Sai manumpak ma Amanta Debata nadiginjang, sai ro ma dihamu angka pansamotan singkat ni i marlipat ganda.
Amangboru… didok natuatua: Marangkup do nauli mardongan do na denggan, siangkupna songon nahundul, siudurna songon namardalan. Asa tangkas ma uju purba, tumangkasan uju angkola. Asa tangkas hita Maduma, tumangkasan ma antong Mamora, angkup ni panggabean parhorasan i haru tangkas ma dipaboa Raja ni Boru, asa tangkas dibege angka Amanta Raja, dohot Inanta Soripada tarlobi angka Raja ni Hula-Hulanta, botima da Raja ni Boru.
RAJA PARHATA NI SITORUS (SAMPE SITORUS) :
I ma tutu Rajanami, mansai las situtu rohanami umbege sungkun-sungkun ni Raja i, tutu ma hamu sisuan bulu jala si panjala, siboto uhum do hamu jala angka anak ni Raja.
Songon nanidok ni Raja i, Asa tangkas ma uju purba tangkas ma uju angkola, tangkas ma hita maduma, tangkasan ma na mamora, paboaonnami ma rajanami angkup ni panggabean parhorasan i:
Rajanami! Nunga tardege balintang hami tarsuruk tohang ni jabu ni Raja i, patuduhon topot-topotnami. Di ari na salpu nunga ro hami manuruk nuruk tu jabu ni Raja i, siala na pajolo holong papudi uhum anak nami beremu martonga ni jabu martonga ni asean anaknami dohot boru ni Raja i ndang tarpatupa hami dope somba ni adat somba ni uhumnami tu Raja i, ala ni pogos do Rajanami. Sitangkasna Rajanami… di luahon anak nami paribanna boruni Raja i.
Tangkas do huarsahi hami roha ni Raja i, nangpe pe songoni pangalahonami mangarsahi hamu tong do suman tu aek na tio do hamu riong riong di pinggan pasu, hulahula nabasa do hamu na tongtong mamasu-masu marhite tangiangmu tu Amanta Debata. Siala tangiang muna i tangkas do hujalo hami pasupasu sian Amanta Debata tarlumobi ma i Rajanami naung pinalumehon ni Tuhanta tubu di hami Pahompu Anak dohot di sorang Pahompu Boru ima pahompunta
Pahompu baoa anak siangkangan margoar: Immanuel Yosua Sitorus
Pahompu boru margoar: Maria Amabel br Sitorus dohot tinodohonna Maria Isabel br Sitorus
Raja nami…. didok natua-tua Paukpauk Hudali, Pagopago Tarugi, Na tading niulahan, Na sega tapauli. Alani i Rajanami marsomba hami tu hamu asa Galagala sitelluk, telluk mardaguldagul. Hasalaan nami na salpu, nanget ma diapul-apul. Asa udut tusi Rajanami namangido ma hami nian diharadeon Raja i asa tauduti sadarion ma nian pasahathon nami somba ni uhum somba ni adat Sulang-sulang pahompu si palas roha ni Raja i, songon i ma pangidoan nami Rajanami.
RAJA PARHATA NI TAMPUBOLON :
Tutuma na nidok muna i Raja ni Boru. Marsak do antong rohanami, ai nang pe songon i nuaeng mansai las do roha nami umbege boa-boa ni amang boru ai nunga tubu jala sorang hape pahompu nami jala didok amangboru naeng pasahathon Sulangsulang Pahompu.
Pat ni gaja tu pat ni hora angka pomparan ni Raja do hamu jala angka namamora. Dibahen i godang ma pasahat hamu jala denggan ma di hatahon Raja ni Boru godang ni Sulangsulang pahompu si pasahathon mu tu hami hulahula muna. Botima Raja ni Boru.
RAJA PARHATA NI SITORUS (SAMPE SITORUS) : Mauliate ma Rajanami, tutu do nanidokmunaiPat ni gaja tu pat ni hora angka anak ni Raja do hita jala angka pahompu ni namora, alai tumangkas do Rajanami dohononnami rap Anak ni Raja do hita naburju marroha.
Tangkas do hutanda hami burju ni rohamu mar-Boru dohot mar- Bere:
Ai songon nidok ni umpama i Rajanami
Urat ni Singkoru, dihunghupi bulung bira, anggo haburjuon ni hamu Raja Tampubolon marboru dohot marbere nunga tarbarita sahat ro didia. Mangingot i do Rajanami umbahen nabarani hami ro tu adopanmu : ai ida-ida do nabutong jora-jora do namale. Jadi namarsomba ma hami tu hamu Rajanami taringot tu Sulang-sulang pahompu sipalas roha ni hamu hula-hula nami, tarsongon on ma nian Rajanami elek-eleknami asa si sahali manombahon ma hami Rajanami disomba ni Uhum, somba ni Adat Sulang-sulang pahompu sipalas roha ni raja i.
Songoni ma somba pangidoannami tu hamu Rajanami.
RAJA PARHATA NI TAMPUBOLON :
Horas ma jala gabe Raja ni Boru, pangidoanmu asa sahali mangelekhon sahali manombahon, nauli ma i Amangboru, tangkas ma di hatahon Amangboru asa tung tangkas botoon ni angka Amanta Raja dohot Inanta Soripada, Botima.
RAJA PARHATA NI SITORUS (SAMPE SITORUS) : Mauliate ma Rajanami, malambok pusu, tangkas ma tutu paboannami pangidoannami tujolo ni Rajai, di Somba ni Uhum, Somba ni Adat Sulangsulang Pahompu sipalas roha ni raja i sipasahatonnami tarsongon on ma Rajanami pangidoannami: Ala sulang sulang pahompu nama raja nami, SITOMBOL ma nian Rajanami, disi ma Lombuna disi ma Horbona disima nang Hodana, songon i nang Mas, Perak dohot Sere pe hupasada hami ma gabe Rupiah na sinetakni pamarentanta.
Andorang so husombahon hami pangidoannami Rajanami asa tangkas di ida Rajai naung sahata hami, denggan ma hualap hami hata sian borunami tarlobi mangido panuturion hami sian Saluhut Hulahula dohot Tulangnami, lehon hamu ma jolo tingki dihami asa manghatai hami Rajanami.
Parjolo ma tu Boru/Bere, didok ma hatana songon on: Di hamu Boru dohot Berenami, hamu do nahupangasahon hami di ulaon on, asa pos roha ni Hula-Hulanami Raja i Tampubolon naung sisada hata sisada tahi hita dihata ni Sulangsulang pahompu sipalas roha ni raja i sisombahononta tu Hula-Hula i Raja Tampubolon, asa lehon hamu ma hata sian hamu Boru dohot Berenami
Hata sian Boru dohot Bere:
Mauliate ma dihamu hula-hulanami, molo sian hami Rajanami, songon dia pe na naeng hatahononmu taringot tu Sulangsuang pahompu dohot Ulaon Adat tu hula-hula ni hula-hulanami, rade ma hami Boru dohot Beremu laho manungkoli hamu di gogo dohot sipatupaon. Mauliate ma.
Raja parhata ni Sitorus (Sampe Sitorus):
Mauliate ma di hamu borunami dohot berenami. Songoni ma dihamu saluhutna nahuparsangapi hami Raja ni Hula-Hulanami dohot Tuang nami (didok ma susunan ni Hula-Hula suang songoni dohot Marga nasida) nunga tangkas di paihutihut hamu pangidoannami tu Raja ni Hula-Hulanami asa sahali manombahon nian hami di Sulangsulang pahompu sipasahatonnami. Andorang so huhatahon hami pangidoannami on Rajanami: mangido ma hami dipanuturion sian hamu, ai hula-hula naburju do hamu naolo manuturi hami angka Pamoruonmu,: ai songon nanidok ni Ompunta naparjoloi do dohononnami: dijolo hamu siaduon Rajanami dipudi hamu sipaimaon sihorus na gok do hamu Rajanami, sigohi nalonga, hupasahat hami ma panghataion on tu hamu, botima.
(huhut dijou Boruna laho pasahathon Microphone)
Hata sian Hula-Hula ni Raja Sitorus:
Dung marsiaturan nasida somalna Hula-hula ma na pasahathon panuturion. Tarsongon on ma:
Mauliate ma di hamu Raja ni Borunami, tangkas do hupaihut ihut hami hamu di panghataionmu dohot Hulahulamu dongan parhundul nami tung mansai denggan marsipaolo oloan. Las bahen hamu roha ni hulahulamu, ai molo las roha nasida hami pe antong las ma roha name. Asa dohonon nami ma antong Balintang ma pagabe tumandanghon sitadoan, arimuna ma gabe molo dung masipaolo-oloan.. songoni ma hata sian hami sude horong ni Hula-Hula dohot Tulangmuna.
RAJA PARHATA NI SITORUS (SAMPE SITORUS) :
Mauliatema Rajanami di panuturion ni Raja i nunga pos be rohanami laho manghatahon godang ni Sulangsulang Pahompu sipasahathon nami tu Hulahulanami Raja i Raja Tampubolon.
Songon i nang di hita namarhaha maranggi, ianggo hita nunga sada hatanta ate, sinangkin nasian jabu i tong sihatahononku ?, Mauliatema.
Rajanami, Hula-Hulanami nunga dibege hamu naung sahata do hami namardongan tubu, borunami tarlobi nunga mangido panuturion hami sian hula-hula dohot tulangnami.
Antong Rajanami, hatahonon nami ma antong godang ni Sulangsulang Pahompu Sipalas Roha ni Raja i sipasahatonnami: Sitombol ma Rajanami, godangna Rp. 7.000.000,-
RAJA PARHATA NI TAMPUBOLON :
Dihita namardongan tubu, songoni nang Boru dohot Berenami, tarlobi di hamu sude nahuparsangapi hami Raja ni Hula-Hulanami, nunga rap umbege hita dinaung dihatahon Raja ni Parboruonta godang ni Sulangsulang pahompu sipasahaton nasida, ima Sitombol, beha alusmu:
Songon on ma pangatur ni panungkunan: (ndang pola be tinaringotan Horbo, Lombu d.n.a.)
Parjolo dipasahat ma tu Boru dohot bere:
BORU :
Mauliate ma Rajanami, diingot hamu do hami antong Borumu, anggo sian hami Borumu, alusnami sipangihut do anggo hami, songon dia pe haputusanmu Rajanami, namangihuthon ma hami, botima hatanami Rajanami.
Songoni ma alus sian Borunta, nuaeng pinangido ma panuturion sian Hulahulanami dohot horong ni Tulangnami.
Di hamu saluhutna Hula-Hula dohot Tulangnami; (unang lupa manjouhon Marga ni Hula-Hulai) nunga rap umbege hita Rajanami di pangidoan ni Pamoruonnami di Somba ni Uhum, Somba ni Adat di hata ni Sulangsulang pahompu sipasahaton nasida jala nunga tung tangkas dihatahon nasida godangna Rp. 7.000.000,-. Andorang so hugabehon hami asa pos rohanami Rajanami mangido ma hami dipanuturion sian hamu sude Hula-Hulanami dohot Tulangnami, ai songon nidok ni Ompunta sijolo-jolo tubu : Ranting ni Bulu Duri, sanjongkal dua jari, hula-hula naburju do hamu na rade manuturi, huhut hula-hula pangajari, (laos digora ma Boruna laho pasahathon Microphone tu Hula-Hula)
Hata sian Hula-Hula: (Hula-Hula manungkun donganna sahundulan = somalna satolop do nasida Tulang ni Boru Muli ma mangalusi)
Horas ma jala gabe dihamu Raja ni Borunami, Taringot ni pangidoanmu tu hami hula-hulamu, nunga satahi hami, ahu ma namangalusi:
Mansai las rohanami umbege panghataionmuna hamu namarhula-marboru di na naung masipaolo-oloan: ba sian hami hula-hulamu sidohononnami tu hamu Balintang ma Pagabe tumandanghon sitadoan, sai Asi ma roha ni Tuhanta, ba arimuna ma gabe molo olo hamu masipaolo-oloan.
Songoni ma hata sian hami Hula-Hulamuna.
RAJA PARHATA NI TAMPUBOLON :
Didok ma mauliate di panuturion ni Hula-Hula.
Dihamu bona ni hasuhuton,
Lata pe na rata duhut huhut do sibutbuton,
Hata pe hata ni Raja tong do hasuhuton si sungkunon. Andorang so hugabehon hami partingkian on hupasahat hami ma tu hamu.
BONA NI HASUHUTON (PAIDUA NI SUHUT) Mauliate ma Hahadoli, Raja do hamu raja naung pinatujolo, Tandokmu do tandokhu, Pandok mu do pandokhu, molo nunga uli didok roha ni Raja i, nunga uli i tong di hami Bona ni Hasuhuton, on pe gabehon hamu ma, Botima.
RAJA PARHATA NI TAMPUBOLON :
Songoni ma dihamu Raja ni Pamoruonnami, nunga dibege hamu panghataion nami namar dongan tubu, Borunami, tarlobi sian Hula-Hulanami, alai nang pe songoni anggo Upa ni Suhi ni Ampang na opat i dohot angka nahombar tu si pasahatonmu do ate Amangboru ? Mauliate ma, on pe amang boru hugabehon hami ma Somba ni Uhum Somba ni Adat Sulangsulang Pahompu si pasahathon muna i.
RAJA PARHATA NI SITORUS (SAMPE SITORUS):
Baris-baris ni Gajah dirura pangaloan molo marsuru Raja dae ma sooloan ba songon dia pandok ni Rajai Huoloi hami mai Rajanami.
Horas ma jala Gabe Rajanami, Mauliate ma dipangoloionmuna dielek-eleknami. Laos digora ma Suhut Sihabolonan mandok songon on:
Di hamu Suhut Sihabolonan nunga tangkas dioloi Hula-Hulanta pangidoanta di godang ni Sulangsulang pahompu sipalas roha nasida sipasahatonta, ro ma hamu laho pasahathon tu Raja i. Parmusik nami ala naeng pasahat Sulangsulang Pahompu ma hami tu Raja i Raja Tampubolon, asa bahen hamu ma musik nahombar tusi,mauliate ma.
Ro ma rombongan ni suhut sihabolonan Paranak, Ama Yosua rap dohot parumaen dohot pahompu mamboan Sinamot di pinggan dohot parbue sipir ni tondi, dipasahat ma jolo tu Raja parhata ni Sitorus (Sampe Sitorus), laos di bilangi ma laos didok Parhata: Nunga hubilangi hami Rajanami las ma roha ni Rajai dung i dipasahat muse tu Raja Parhata ni Tampubolon, baru pe asa borhat nasida manomba Suhut Sihabolonan Parboru. Si Yosua ma di jolo mamboan pinggan na marisi Sulangsulang Pahompu i diihuthon Ibotona (Maria Amabel dohot Maria Isabel) di uduti Ama Yosua dohot parumaen.
Dung ditortorhon, dipatedek Parboru ma ulosna jala diusehon Pahompu rap dohot Ama Yosua sude isi ni pinggani tu Ulos i. Ditungkus Inanta i ma Sinamot i laos dibagasan Ulos i, – dungi masijalangan.
Ihut ma muse pasahat Panandaion Sulangsulang sipalas roha tu Suhi ni Ampang Naopat dohot uduranna (hombar tu daftar ni sijalo todoan).
• Pinggan Panganan : tu Raja parhata ni Tampubolon upa ni natorop (somalna Parboru do naparadehon pinggan panganan alai dipasahat ma jolo tu Raja parhata ni Sitorus (Sampe Sitorus) asa songon na sian Paranak Pinggan Panganan i)
• Tulang ni Hela : Sijalo Surungsurung Tulang Tangkas songon singkat ni Upa Tintin Marangkup (napasahathon Suhut Parboru Tampubolon nidonganan ni Suhut Paranak. Dijalo Suhut Parboru ma amplop namarisi hepeng sian Paranak laos dipasada tu amplop nanaeng sipasahatonna tu Tulang ni Hela i.
Hata ni Suhut Parboru : (Note Tulang ni Ama Josua marga Tampubolon ai namangalap boruni Tulangna do ibana – parumaen i diain gabe boru Tampubolon)
Dihamu Dongan Tubu nami Godang do hujalo hami Sulangsulang sian pahompunta, ba dison otik godangna sian Sulangsulang pahompu i hupasahat hami ma Surung surung sipalas rohamu. Las ma rohamu manjalo, Horas ma, jala mauliate.
Hata ni Tulang ni Hela: Mauliate ma di dongan tubu nami, Dison nunga dipasahat hamu tutu tu hami sian Sulangsulang ni pahompunta i, songon sipalas rohanami, mauliate ma dihamu, jala dohononnami ma horas ma hita na marhaha maranggi.
Laos di son ma suhut Paranak pasahathon Pinggan Panganan tu saluhut horong ni Hulahula dohot Tulang. Dung i di uduti ma muse.
RAJA PARHATA NI TAMPUBOLON:
Amangboru, mauliate ma dohononnami tu hamu Pamoruonnami, nunga sude hami marlas ni roha, ganup do hami taruli di sulangsulang pahompu naung pinasahatmuna, ba didok rohanami Amangboru, asa dos nangkokna dohot tuatna, atik adong sipangidoonmu sian hami hula-hulamuna, dok hamu ma, olat ni natolap gogonami oloannami do pangidoanmu.
RAJA PARHATA NI SITORUS (SAMPE SITORUS):
Horas ma jala gabe Rajanami, mansai las rohanami diboa-boamunai, asa pasahatonnami ma pangidoannami tu hamu Rajanami: Anggo pangidoan Rajanami asa Ulosi hamu ma hami sude dohot Ulos Herbang didongani tangiangmuna mangido pasu-pasu sian Amanta Pardenggan Basa i, Songoni ma pangidoannami Rajanami, mauliate ma.
(Ala naung adong hian panghataion taringot tu bahat ni Ulos Herbang sipasahaton Parboru tu Paranak didok Raja parhata ni Tampubolon ma:
RAJA PARHATA NI TAMPUBOLON: Mauliate ma Amangboru, sintong do pangidoanmunai, alai songon naung hudok hami dihatanami naparjolo nangkining, olat ni na boi tarbahen hami Ulosannami do hamu dohot Ulos Herbang, alai molo tung so sude pe hamu annon na boi huulosi hami marhite Ulos Herbang, pasahaton nami ma tu nasida Ulos na tinonun Sadari, songoni ma Amangboru, mangarade ma hamu:
Raja parhata ni Sitorus (Sampe Sitorus)
Mauliate ma rajanmi .jala pasahat hamu ma (di jahahon ma sada-sada hombar tu daftar sijalo ulos)
1 Ulos Pansamot
2 Ulos hela
3 Ulos tu pamarai
4 Ulos tu simanggokhon
5 Ulus tu sihunti ampang
6 Ulos tu bapa tua na
7 Ulos tu bapa udana
8 Ulos tu namboruna
9 Ulos tu ibotona
10 Ulos tu parompuon
11 Ulos tu Parsadaan .
Laos dipasahat ma dohot ulos tinonun sadari. Digorahon Raja Parhata ni Sitorus ma naung dijalo ulos-ulos songon ulos tinonun sadari, laos dibagihon ma tu saluhut horong ni Sitorus dohot Boruna na ro mangadopi ulaon i.
RAJA PARHATA NI SITORUS (SAMPE SITORUS):
Rajanami… datung so tagamon adong parbue holong si pasahathon mu tu anak dohot parumaennami, partingkian on hupasahat hami ma tu Raja i.
Raja parhata ni Tampubolon
Pos rohamu amangboru, jou hamu asa mangarade ma helanami dohot borunami.
RAJA PARHATA NI SITORUS (SAMPE SITORUS):
Songoni ma di anak dohot parumaenniba, ala naeng pasahat ulos holong ma Hulahulanta Raja i Tampubolon asa mangarade ma hamu.
Diuduti ma pasahat ulos holong dimulai sian hasuhuton parboru, na mardongan tubu dohot na marpariban, dongan sahuta sahat tu Parsadaan .
Raja parhata ni Tampubolon
Songon ima amang boru nunga ris hami pasahat ulos , ipe asa hupasahat hami tu hula hula nami tingkion lao pasahat parbue ni holong tu boru dohot hela nami suru hamu ma nasida tu jolo on .
RAJA PARHATA NI SITORUS (SAMPE SITORUS):
Mauliate ma rajanami.jala pasahat hamu ma .
Raja parhata ni Tampubolon
Dihamu horong ni hula hula dohot tulang nami, atik tung adong parbue ni holong sipasahaton mu tu boru dohot hela nami, partingkian on hupasahat hami ma tu hamu. Rajanami… molo siat pangidoannami laos dipartingkian on ma pasahat hamu hata pasu pasu tu boru dohot helanami. Dang na mangajari hami molo siat pangidoan hamu hula hula ma na gabe pargomgom. Botima di hamu hula hula dohot tulang nami .
Dialusi hula hula laos di jou ma sada sada ,dimulai sian hula hula anak manjae.
Dung sidung horong ni hula hula dohot tulang ni Parboru, didok Raja Parhata ni Tampubolon ma:
Mauliate ma di hamu hula hula dohot tulang nami ,nunga dipasahat hamu ulos holong dohot pasu pasu tu beremu ima hela dohot boru nami sai anggiat dipasaut Debata angka tangiang dohot pasu pasu mu i. Asa dohonon ma songon hata ni si tua tua ,
tingko ma inggir inggir ,bulung nai rata rata ,
hata pasu pasu mu i sai pasauthon ma amanta Debata ”
Asa mangerbang bunga bunga toho di parnakhok ni mata ni ari ,
Molo tung parjolo pe hamu hulahula nami marhehe nauli tangiang nami tu Amanta Debata Horas hamu dipardalan, horas ma hami na tading manguduti ulaon on.
Songon ima amang boru nunga sidung hami dohot hula hula nang tulang nami on pe hupasahat hami ma partingkian on tu hamu ,
RAJA PARHATA NI SITORUS (SAMPE SITORUS):
Mauliate ma rajanami, Dihamu horong ni hula hula dohot tulang nami didok natua tua:
Obuk do jambulan ni dandan baen samara.
Pasupasu marhite tangiang ni Hulahula dohot Tulang padao sahit padao mara.
Alani i Rajanami atik tung adong sipasahaton mu tu anak dohot parumaennami, partingkian on hupasahat hami ma tu hamu, laos molo siat pangidoan nami asa dipartingkian on ma pasahat hamu hata pasu pasu tu anak dohot parumaen nami . Udut tusi Rajanami dang na mangajari hami, molo siat pangidoan hamu hula hula Tampubolon ma na gabe pargomgom asa marsiaturan ma hamu .Botima di hamu hula hula dohot tulang nami. Boru nami pasahat hamu microphone on tu Raja i.
Dialusi hula hula laos di jou ma sada sada, dimulai sian hula hula anak manjae.
Dung sidung horong ni hula hula dohot tulang ni Paranak mangulosi ,
RAJA PARHATA NI SITORUS (SAMPE SITORUS):
Mauliate ma di hamu hula hula dohot tulang nami, nunga dipasahat hamu ulos holong dohot pasu pasu tu beremu ima anak dohot parumaen nami sai anggiat dipasaut Debata angka tangiang dohot pasu pasu mu i. Asa dohonon ma songon hata ni si tua tua ,
“ tingko ma inggir inggir ,bulung na i rata rata ,
hata pasu pasu mu i sai pasauthon ma amanta Debata ”
“Asa naung sampulu pitu ma jumani sampulu ualu .
Hata pasu pasu mu i ampuonnami ma i antong martonga ni jabu “
Molo tung parjolo pe hamu hulahula nami marhehe nauli tangiang nami tu Amanta Debata
“ Asa mangerbang bunga bunga toho di parnakhok ni mata ni ari ,
Horas hamu na parjolo marhehe nauli, horas ma hami na par pudi.
Jadi songon ima di hamu hula hula nami ala nunga singkop ulaon ta ninna roha nami ta uduti ma marhata si gabe gabe sian hamu, mangampu ma sian hami. Dung i ta ulahon ma Upa manggabei, ipe asa ta paujung ulaonta marhite tangiang sian hamu hulahula nami laos pasahathon nami ma Pasituak Natonggi. Botima Rajanami.
Raja parhata ni Tampubolon
Nauli mai amang boru .
Dungi marhata si gabe gabe sian horong ni Parboru Tampubolon, di pasahat ma tu Bona ni Hasuhuton.
RAJA PARHATA NI SITORUS (SAMPE SITORUS):
Mauliate ma Raja nami, songon patujolo ni pangampuion nami, molo tung sahalak pe hami mangampu Rajanami naung sude ma hami Parboruonmuna Raja Sitorus dohot Boruna mangampu, uli ma roha ni Raja i.
Asa dohonon nami ma antong:
Aek marjullakjullak sian tongatonga ni batu,
jullak jullak na i pamasuhon tu tabu tabu laho bohanon tu jabu.
Saluhut hata nauli hata pasu gabe naung pinasahat ni hamu nahuparsangapi hami tarlumobi ma i Hulahulanami Tampubolon, ampuon nami ma i antong martonga ni jabu.
Songon i ma dihamu Bona ni hasuhuton nami sahat ma tingkina di hita mangampu nauli mangampu nadenggan hata pasu gabe naung pinasahat ni saluhut na taparsangapi tarlumobi ma i sian Hulahulanta Raja Tampubolon. Antong pangampuion on pinsahat ma tu hamu, botima.
Dung sidung mangampu di uduti a dohot upa manggabei, borhat ma Raja Parhata Sitorus tu adopan ni Raja Parhata Tampubolon.
Raja parhata ni Tampubolon
Hata di tingki ulaon olop olop sian Raja parhata ni Tampubolon .
“ Silallan uruk uruk silallan aek toba , na metmet dang marungut ungut , na magodang pe marlas ni roha ”
Ta olophon ma: Horas, Horas, Horas.
Laos dipamasuk Raja Parhata ni Sitorus ma hepeng indukna i (Seratus Ribuan) tu hajut ni jas ni Raja Parhata ni Tampubolon songoni nang baliksa (sebaliknya), laos didok Raja Parhata ni Paranak ma: boras na i ma di hami Tulang, jumolo ma dibuat Raja Parhata ni Tampubolon manang piga lembar uang parribuan jala mulak ma Raja Parhata ni Paranak tu hundulanna laos dibuatma 2 lembar dungi di bagi-bagi ma tu angka namarhaha maranggi Sitorus dohot Boruna.
Dungi ditutup hulahula marhite ende dohot tangiang .
Marsijalangan ma laos dipasahat ma pasituak natonggi ni angka hulahula. (Ndang adong paulak une dohot tingkir tangga).
Note:
Hurang lobi songon i ma na boi huingot panghataion hatiha gabe Raja Parhata ahu di uloan Pasahat Sulang Sulang Pahompu anaknami keluarga Jeffer Hawer Sitorus,SE,MM dohot parumaennami Mira Koesoema Rany br Tampubolon, SH (A.Imanuel Yosua Magistero Sitorus) par Batu Ceper di ari Sabtu 19 Maret 2011.
Adong do deba naung pinatingkos sian aslina hatiha manghatai ala dituturi angka natua-tua iba songon hahadoli St. Rindu Sitorus (Pane), Anggidoli Posman Sitorus,S.Sos, Anggidoli Darman Sitorus. Mauliate ma di panuturion ni nasida.
